DVD : Lo rire de Petaçon

DVD : Lo rire de Petaçon - De comandar (12 euros, fraisses de mandadís compreses) a : IEO-Aude BP 105 - 11022-Carcassona Cedex - Lo Brunò Peiràs
Lo film sus la manifestacion del 22 d'octobre se sona " lo rire de petaçon " e dura un quarantenat de minutas (39 per èsser exact). Es pas ni un reportatge, ni un film militant, ni un film de comanda, es puslèu un cort-metratge de creacion, e un testimoniatge engatjat.
I ausiretz e i veiretz entre autris presas de paraulas de : Claudi Alranc, David Grosclaude, Robert Marti, Inès Cavalcanti, Claudi Marti, Ben Vautièr, Joan Larzac, e maites , òmes, femnas, joves, vièlhs, mainatges, vinhairons, bretons, etc ...
Siáguèt virat e montat amb un material amator (una camera e un micrò) per un apassionat de video {lo Daniel Devin) qu'es pas ni occitan ni occitanofòne nimai occitanista mas qu'es un òme de curiositat, qu'aviá ja trabalhat per Calandreta de Ciutat a Carcassona, e qu'ajudèri per las entrevistas e per la concepcion.
Aquel document es pas solament una memòria que pòt tanben èsser una ajuda per presentar la revendicacion linguistica occitana per exemple dins un acamp public, un grop interessat per la lenga o la cultura nòstras, una associacion -ostal de joves, club de vièlhs ...- quina que siágue que se voldriá assabentar sus la lenga e charrar de çò que caldriá far per ela .
Lo public potencial son de monde que son pas estrangièrs a la lenga (los passatges en occitan son pas jos-titolats en francés) mas que son pas necessariament "occitanistas fervents" per repréner l'expression d'una de las personas entrevistadas.
Es fait per butar a la paraula e per ajudar a faire bolegar las causas, e coma ba ditz lo Glaudi Alranc a la debuta " per rire lo monde e atal n'inventar un novèl "... es pas interdit de somiar !
De comandar (12 euros, fraisses de mandadís compreses) a : IEO-Aude BP 105 - 11022-Carcassona Cedex - Lo Brunò Peiràs

Mas remarcas sus aquel DVD que lo Bruno aguèt l'amabilitat de me mandar :
" Es plan, ritmat, ric, òm se regala de i reconéisser de mond. I se vei de longa nòstre mèstre fialaire lo Joan Miquèu Espinasse. Regreti pasmens qu'en cap de luòc i sia pas evocada la plaça e l'especificitat de la FELCO, que degun de nosautres i sia pas entrevistat, alara qu'o son longament David Grosclaude, Padena, de dròlles de Calandreta (adorables, que vos parlan una lenga d'un natural !), d'Occitans d'Itàlia e de Val d'Aran, puèi de quidams + un Alranc petaçon que ditz de causas interessantas e Joan Larzac reviscolat.
Aquò es un pauc fauta nòstra. Rai, aviam los tractes, los drapèus e la bandièra. Mai degun de la FELCO s'es pas sentit de tenir un estand sus la plaça abans la manif. Es aqui, lo matin, que viravan fotografs e jornalistas. Nautres (suls conselhs dels collègas del primièr gra de Carcassona) èrem coma de colhons dabans Mac Do ! Ont cap de jornalista ni cap de fotograf passava pas. Son las amigas de la FSU, Isabelle Sargeni e Patricia Laborie, la secretària de la FSU Bretanha que me'n faguèron lo mai la remarca, qu'èrem pas vesedors. E son d'acostumadas de las manifs, Isabelle e Patricia." Marie Jeanne Verny